GRATË NE ARTET LETRARE

 Udhëtojmë mbrapa mbi shtatë dekada, në kërkim të poetes dhe shkrimtares së parë në artet letrare kosovare, aty ku edhe fillon letërsia jonë nga gratë krijuese. Mirëpo, kur flasim për letërsinë, në fakt, ku i ka rrënjët letërsia globale? Me Iliadën dhe Odisenë e Homerit, e cila u shkrua pothuajse 3000 vjet më parë, apo me Eposin e Gilgameshit, shkruar nga një poet i panjohur, para rreth katër mijë vjetëve, në Mesapotaminë e lashtë. E nëse kërkojmë të rrugëtojmë dhe të hulumtojmë periudhën para Homerit, pak gjasa kemi të hasim dhe të zbulojmë identitetin e autorëve. Porse, një gjë është e sigurt! Autori i parë në historinë botërore është gruaja e quajtur Enheduanna. Në letërsinë shqiptare, ndërkaq, edhe pse poeti i parë nuk i takon gjinisë femërore, ne mund të identifikojmë letraret kosovare, të cilat, ndonëse vepruan në rrethana aspak të lehta, arritën të shembnin mure dhe të ecnin krenare mbi to. Pas poeteshave tona më të para në letrat shqipe këtu te ne, Ganimete Nura e Nusrete Vula,  Sevdije Boshnjaku e Nevzete Omeragaj, që u vijuan pastaj me shumë të tjera, si: Flora Brovina, Edi Shukriu, Miradije Ramiqi, Lindita Aliu, Sabile Keçmezi, Qibrije Demiri etj., në vazhdim ju ftojmë të zbuloni gjashtë rrëfime mbresëlënëse të shkrimtareve dhe poeteshave kosovare, veprat e të cilave gjithsesi duhet t’i lexoni gjatë jetës suaj. Veçuam një grup të vogël të shkrimtareve jashtëzakonisht të denja, që kanë pasuruar letërsinë kosovare me krijime domethënëse, me vështrime të thella dhe të qëndrueshme. Janë këto gjashtë autore - zonja të arteve letrare, të cilat admirohen për punën e tyre, patrembësinë, origjinalitetin dhe ndikimin e tyre në botën letrare e më gjerë.